Azərbaycan Qol Güləşi Federasiyasının prezidentinin Dopinqlə əlaqədar MÜRACİƏTİ

Bununla belə hesab edirəm ki, dopinq vasitələrindən istifadəyə qarşı mübarizə tədbirləri daha çox məhz idman federasiyaları və əlbəttə ki, ilk növbədə bu qurumların rəhbərləri tərəfindən həyata keçirilməlidir. İdmanımızın və idmançılarımızın bu bəladan qorunması da ilk növbədə məhz federasiya rəhbərləri, məşqçilər və bu sahədə çalışan digər məsul şəxslər tərəfindən təmin olunmalıdır.
Etiraf edim ki, son vaxtlara qədər şəxsən mən rəhbərlik etdiyim Azərbaycan Qol Güləşi Federasiyasında belə bir problemin olmadığına əmin idim. Lakin son dünya çempionatında yer almış bəzi məqamlar bunu deməyə əsas verir ki, federasiyamızın bəzi idmançıları və hətta rəhbər vəzifəli şəxsləri də onlara göstərilən etimaddan sui-istifadəyə yol vermiş, ucuz şöhrət və saxta nailiyyət naminə federasiyamızın və ümumilikdə idmanımızın adına ləkə gətirə biləcək addım atmışlar.
Belə ki, Qazax rayonu "Bioman” idman klubunun təmsilçisi Qismət Vəkilovun Qol Güləşi üzrə 38-ci dünya çempionatının gedişində qadağan olunmuş kimyəvi maddələrdən, dopinq vasitələrindən istifadə etdiyi müəyyən olunmuşdur. Təbii ki, bu faktla bağlı araşdırma aparılacaq və Qismət Vəkilova qarşı Ümumdünya Antidopinq Komitəsi tərəfindən müəyyən sanksiyalar tətbiq olunacaqdır. Həmçinin Dünya Armrestlinq Federasiyasının son konfransının gedişində qəbul olunmuş qərara əsasən dopinq vasitələrindən istifadə etdiyi müəyyənləşdirilmiş idmançının məşqçisi də həmin idmançı ilə eyni müddətə idmandan kənarlaşdırıla bilər.
Təbii ki, Azərbaycan Qol Güləşi Federasiyasının rəhbərliyi də bu baş verənlərə göz yuma bilməz. Mən hər zaman bütün idmançılarımıza demişəm və indi bir daha təkrar edirəm: bu yolla əldə olunan medallar nə bizim dövlətimizə, nə xalqımıza, nə də federasiyamıza lazım deyil! İlk növbədə ona görə ki, dopinq vasitələrinin qəbulu insana Allah tərəfindən bəxş olunmuş ən gözəl neməti, onun sağlamlığını əlindən alır, insan bədəninə bərpa olunmayacaq ziyan vurur. Digər tərəfdən də, dopinq vasitələrindən istifadə etməklə yüksək yer tutan, medal qazanan idmançılar digər idmançıların da haqqlarına girmiş olurlar. Bu isə, tamamilə yolverilməz haldır.
Həmçinin məndə olan məlumatlara görə, bəzi yaramaz və şərəfsiz insanlar bu kimi məqamlarla bağlı Azərbaycan Qol Güləşi Federasiyasının rəhbərliyinin adını da hallandırmaqdan çəkinmir, guya ki, müəyyən hallarda rəhbərlik tərəfindən idmançıların dopinq qəbul etmələrinə göz yumulduğu barədə əsassız iddialar irəli sürürlər.
Mən Avropa Armrestlinq Federasiyasının vitse-prezidenti və Azərbaycan Qol Güləşi Federasiyasının prezidenti olaraq bir daha tam məsuliyyətlə bəyan edirəm ki, tutduğum hər iki vəzifənin mənə verdiyi səlahiyyətlər çərçivəsində indiyə qədər idmanda dopinq vasitələrindən və metodlarından istifadəyə qarşı hər zaman mübarizə aparmışam və bundan sonra da bu mübarizəni qətiyyətlə davam etdirəcəyəm.
Ayrıca olaraq, federasiyamızın bütün idmançılarının və məşqçilərin diqqətinə bir daha çatdırmaq istəyirəm: dopinq vasitələrindən və qadağan olunmuş kimyəvi maddələrdən istifadə etdiyi müəyyən olunmuş idmançılar, eləcə də onların məşqçiləri bundan sonra daha ciddi şəkildə cəzalandırılacaqlar. Həmin idmançılar heç bir ölkədaxili və beynəlxalq yarışlara, turnirlərə qətiyyən buraxılmayacaqlar. Bu idmançıların məşq etdikləri klublar və idman zalları, o cümlədən AQGF Qol Güləşi İdman Mərkəzinin zalı da daxil olmaqla, federasiya tərəfindən tanınmayacaq.
Biz hər zaman yalnız düzgünlüyün, ədalətin və sağlam rəqabətin tərəfdarı olmuşuq və bundan sonra da belə davam edəcək!"
Avropa Armrestlinq Federasiyasının vitse-prezidenti,
Azərbaycan Qol Güləşi Federasiyasının prezidenti C.M. Əhmədov