"Səbail" FK UEFA-nın "İrqçiliyə yox deyək!" kampaniyasına dəstək oldu!

Bu gün dünyada müxtəlif sahələrdə olduğu kimi, futbolda da irqçilik ciddi problemə çevrilib. Nəinki futbolçular, hakimlər, hətta azarkeşlər də dəri rənglərinə, yaşadıqları ölkəyə, mənsub olduqları dinə, hətta dünyagörüşlərinə görə təhqir olunurlar və təzyiqlərə məruz qalırlar.
"Səbail" FK futbol adına ləkə salan və ümumiyyətlə, insanlıqdan uzaq olan bu cür halları pisləyir, irqçiliyə qarşı mübarizə aparacağını bəyan edir.
Futbol - bütün dünyanı bir meydanda birləşdirir.
Futbol - müxtəlifliyi ilə seçilən insanları azarkeş bayrağı altında futbol klublarının ətrafına toplayır.
Futbol - sərhədsizdir. O dostluqdur, o sülhdür, o idmandır, o sağlamlıqdır, o sağlam düşüncədir!
"Səbail" FK hər kəsi sağlam düşünməyə, sağlam futbolu dəstəkləməyə və insanlar arasında fərq qoymamağa çağırır. Yeganə fərqimiz azarkeşlik etdiyimiz komandalar olsun!