Hüquq müdafiəçisi Ramil İskəndərli Beynəlxalq Konqresdə iştirak edəcək

Mart ayının 7-dən 12-dək Yaponiyanın Kioto şəhərində BMT-nin 14-cü Cinayətkarlığın qarşısının alınması və cinayət ədliyyəsi üzrə Konqresi (qısa olaraq Cinayətkarlıq üzrə Konqresi) keçiriləcək.
 
Dünyanın əksər BMT üzv ölkələrindən olan ədliyyə və hüquq mühafizə orqanları, əlaqədar mərkəzi icra orqanları, məşvərətçi statusuna malik beynəlxalq təşkilatlar, yerli qeyri-hökumət təşkilatları və fərdi ekspertlərin iştirak etdiyi bu Konqresdə vətəndaş cəmiyyəti nümayəndəsi olaraq "Hüquqi Təhlil və Araşdırmalar” İctimai Birliyinin sədri Ramil İskəndərli də iştirak edəcək. O, bu Konqresə pandemiya ilə əlaqədar onlayn formatda qoşulacaq.
 
Ramil İskəndərli bu Konqressdə Mərkəzi ofisi Vyanada yerləşən "Cinayətlərin Qarşısının Alınması və Cinayət Ədliyyəsi üzrə QHT-larının Alyansı” beynəlxalq təşkilatını təmsil edən müstəqil mütəxəssislər sırasında olacaq.
 
"Cinayətlərin Qarşısının Alınması və Cinayət Ədliyyəsi üzrə QHT-ları Alyansı” beynəlxalq təşkilatı 1972-ci ildə Birləşmiş Millətlər Təşkilatı ilə məşvərətçi statusuna malik olan və cinayətlərin qarşısının alınması və cinayət mühakiməsinin inkişafına çalışan beynəlxalq QHT-lərin koalisiyası olaraq yaradılmışdır. Alyans sonradan BMT orqanları ilə məşvərətçi statusuna malik olmayan, lakin cinayət və ədalət mühakiməsində maraqlı olan seçilmiş milli QHT-lərin daxil olması üçün üzvlük imkanlarını genişləndirmişdir. "Hüquqi Təhlil və Araşdırmalar” İctimai Birliyi keçən ildən etibarən bu təşkilatla sıx əlaqələr qurmuşdur.
 
Alyansın missiyası cinayətlərin qarşısının alınması və cinayət ədliyyəsi sahəsində qlobal ictimai nəzarət funksiyasını yerinə yetirməklə araşdırma, tədris, təbliğat tipli fəaliyyəti ilə məşğul olan qeyri-hökumət təşkilatlarının nümayəndələrini koalisiyada bir araya gətirməkdir. Alyans bu gün Nyu-Yorkda beynəlxalq ofisi olmaqla, mərkəzi ofisi Vyanada olan, canlı görüşlər, onlayn, qarışıq iclaslar, veb sayt və daha çox sayda əlaqə yolu ilə Alyans üzvlərini birləşdirməyə çalışmaqda davam edir.